Granate: Vars sap en vrugte uit Outjo

Op die kleinhoewe Grace, net buite Outjo, staan 2 200 granaat-bome wat vrugte vir die 100% organiese produkte van Ruby Grace lewer.

Sowat tien jaar gelede het Outjo se Chrisman Stander en sy vrou, Trudie, besluit om bome op hulle kleinhoewe te plant.

Aanvanklik het hulle suurlemoenbome oorweeg. “Ek het op ‘n dag vir Trudie gesê dat ons moet neerskryf watter bome elkeen van ons graag sou wou plant. Snaaks genoeg wou ons albei granaatbome hê. So gesê, so gedaan,” vertel Chrisman.

Hulle het die “Wonderful”- granaatvariëteit vanuit Suid-Afrika gekoop, ingevoer en geplant. Na sy besending van 2 200 bome op die plot aangekom het, het Chrisman begin gate grawe en waterpype aangelê. 

“Ek en my vrou het elke boom self geplant. Ons kon elke dag sowat 60 plant. En drie jaar later het ons ons eerste vrugte geoes.” 

’n Deel van die eerste oes is as heel vrugte verkoop terwyl die res versap is. Chrisman verkoop granaatsap, uitgedopte pêrels in bakkies en die heel vrug onder die naam Ruby Grace. 

“Die plot se naam is Grace en die pêrels lyk soos robyne - dus die naam Ruby Grace.” 

“Ons het besef Namibiërs hou nie daarvan om self die vrugte te skil en die pêrels uit te haal nie. So aan die begin het ek en Trudie in die aande, wanneer ons by die huis aangekom het, gesit en die pêrels uitgedop.”

“Ons doen dit nog steeds met die hand, maar nou het Trudie ‘n span wat haar met die werk help. Ek het ook ‘n versappings masjien aangeskaf, wat die sap maak.”

’n Geoesde granaat word nie verder ryp nie en kan vir meer as drie maande gebêre word. As dit in die yskas is, kan dit tot nege maande behoue bly. “Die skil krimp en raak verrimpeld, maar die pêrels binne is kraakvars soos die dag toe dit geoes is,” sê Chrisman.

Organies

Twee jaar gelede het Chrisman besluit om oor te skakel na 100% organiese boerdery. 

“Dit is glad nie maklik nie en ek het al baie gedink om weer terug na chemikalieë toe te gaan, maar ek sal nie. 

“Ek wil die verbruiker ‘n gesonde, organiese produk bied, sonder enige chemiese toevoegings. Wanneer jy ‘n Ruby Grace produk koop, weet jy wat jy kry. Dit is soos dit van die ‘ma afkom’ geen chemikalieë en geen gif is gebruik nie.”

Volgens hom is ‘n organiese boerdery ‘n leerproses omdat jy moet raai hoeveel hoender of beesmis jy moet gebuik om ‘n optimale oes te kry.

“Wanneer jy ‘n sak chemiese kunsmis koop, weet jy presies hoeveeel en wat daar binne is asook hoeveel jy moet gebuik. So ek leer elke jaar en elke jaar word die oes beter en groter. Ek kan met trots sê dat my produkte nie net 100% Namibies is nie, maar ook 100% organies en gesond.” 

Die produkte kan direk by Chrisman gekoop word of by die Spar op Outjo, Windhoek en Swakopmund.